مقال شامل عن موعد صيام الاطفال وكيفية تعويدهم على الصيام فى رمضان

اختلف عُلماء الفقه في موضوع وقت صيام  الأطفال .

فمنهم من قال بما أن الصيام رُكن من أركان الإسلام فيعامل معاملة الصلاة و اللي حديثها كالٱتي :-

قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ( مُرُوا أَوْلَادَكُمْ بِالصَّلَاةِ وَهُمْ أَبْنَاءُ سَبْعِ سِنِينَ ، وَاضْرِبُوهُمْ عَلَيْهَا وَهُمْ أَبْنَاءُ عَشْرٍ ، وَفَرِّقُوا بَيْنَهُمْ فِي الْمَضَاجِعِ ) .. صدق رسول الله صلى الله عليه وسلم

يبقى ندَرب الأطفال على الصيام زي الصلاة من ٧ سنوات و بعدين يكون الزامي من ١٠ سنوات . ⁩

الرأي التاني بيقول إن الصيام الزامي عند مرحلة البلوغ اللي هي من ١٢ الى ١٣ سنة .

و سواء أخدنا بالرأي الأول أو التاني لازم في كلتا الحالتين نبدا تدريب الأطفال من بدري شوية شوية و واحدة واحدة علشان تترسخ عنده مبادئ الصيام ما هو بالعقل كده مش هنيجي عند ١٠ و الا ١٢ سنة و نقوله يلا يا حبيبي هتصوم ١٨ ساعة …. في الوقت دا الولد هايفتكرنا بنخرف و لا يُلام الصراحة

ركزوا معايا علشان ما نوصلش معاهم للمرحلة دي الله لا يقدر :-

عندنا مرحلتين هنتعامل معاهم :-

من ٥ الى ٧ سنوات .
من ٧ سنوات فما فوق

و في المرحلة الأولى ( ٥ : ٧ ) لازم تتوفر الشروط الٱتية :-

إن الطفل يكون بصحة جيدة لا يعاني من أي أمراض مزمنة زي السكر و أمراض الكلى و الأنيميا أو وزنه ناقص أو عنده ديدان .

تاني حاجه إنه لازم يكون هو اللي عايز يجرب بدافع تقليد الكبار يعني مفيش إجبار في العُمر دا

الطرق و الأنظمة كتير و كلها هدفها واحد ألا و هو ربط الطفل نفسياً و وجدانياً بشعائر الشهر المُعظم فقط … و منها مثلاً إننا نخليه يصوم قبل الإفطار ب نص ساعه أو ساعة و نحاول نزود الوقت ….. أو إننا نخلليه يصوم من صلاة العصر لصلاة المغرب بالتدريج …. و غيرها و غيرها
بس لقيت نظام جميل و له عدة مزايا علشان كده هاحكيلكم عليه :-

١- هنخللي الطفل يقوم يتسحر معانا و بعد السحور لو عايز ينام هنسمحله طبعا لو مش عايز يكون أفضل و هنخلليه وسطنا يلعب و احنا بنصللي و نقرأ القرٱن للفجر و لو عايز يشاركنا تبقى حاجه جميلة …

٢- بعد ما يصحى من النوم الصبح لو جعان أو عطشان هنخلليه ياكل و نتفق معاه إنه مفيش أكل و شرب لغاية صلاة الظهر …و في الغالب نومه المتأخرة هايصحيه على صلاة الظهر …و بالتالي هياكل و يشرب مع الأذان و نربط وقت الوجبه بإنه نص ساعة بعد الأذان مثلاً مش أكثر

٣- هنتفق معاه إنه يمسك عن الأكل بعد كده من الظهر للعصر ( حوالي ٤ ساعات) و حسب مقدرته … لو قدر تمام لو ما قدرش هنقدمله وجبته و طبعا ما ننساش الماء في الوقت اللي هايجوع فيه و برده هنحدد وقت الوجبة نص ساعة مش أكتر و يُمسك مرة أخرى.

٤- من صلاة العصر للمغرب ( حوالي ٤ ساعات ) و دي أهم فترة و هنحاول نساعده إنه يستحمل أكبر وقت و نلهيه بقراءة القصص أو متابعة كارتون على ال T.V..أو إنه يشاركنا الذكر و التسبيح و يشاركنا قراءة القرٱن …
و لو مش قادر خالص ممكن نلاعبه لعبة شيف المطبخ اللي هو يدوقلنا الأكل فقط و يشوف لذيذ و الا لأ

٥- هايفطر معانا ساعة صلاة المغرب على السفرة …

إيه فائدة النظام دا :-

الطفل بيعيش طول الشهر أجواء السحور و الإفطار و الذكر و قراءة القرٱن و تجهيز الإفطار و دا بيحفر في ذاكرته أيام رمضان الجميلة و بيشجعه لإنه بيقدر كل يوم عن التاني يقلد الكبار.

منع الطفل من النقنقه طول اليوم و تحديد أكله في وجبات بيخلليه يجوع و أدائه في الأكل بيتحسن

تحديد وقت الوجبة بيخللي الأطفال اللي بياكلوا ببطئ يغيروا الطبيعة دي و يأكلوا أسرع لإنهم جعانين و المفروض هايبدؤا صيام تاني .

وياريت ما ننساش كل يوم على الفطار نسقفله سقفة كبيرة مع قبلات و أحضان كتيرة على إنجازة و مفيش مانع من هدية بيحبها علشان صام أو خروجة بيحبها … لازم تكافؤوه و توصلولوه إنكم أد إيه مقدرين إنجازه الكبير ..

طيب و المرحلة التانية اللي فوق ٧ سنين لازم نراعي في المرحلة العُمرية دي إن أركان شخصية الطفل بدئت تكتمل و لازم نحترم حاجة زي كده و بالتالي لازم نجهزه نفسياً كويس أوي و نفهمه إيه هو الصيام من الناحية الدينية و الناحية الفسيولوجية زي إيه اللي ممكن يحس بيه سواء من عطش أو جوع و قلة نشاط و إن دا طبيعي يحصل لجسمه … و إن كل ما إستحمل ثوابه هايكون عند ربنا أكبر

لازم نقرأ معاه كتب عن الصيام و قصص عن أبطال مسلمين خاضوا حروب و هم صائمين و إنتصروا ⁩

ما ينفعش نديهم أمر الصيام فقط لإن هو كده أو لإن مثلاً أولاد خالته في سنه و صائمين و هو لأ …. ما ينفعش خالص لإن كده مش هايوصله من فكرة الصيام غير العطش و الجوع و الإجهاد و الألم النفسي من الحرمان و بالتالي هايكره ركن من أركان الإسلام و دا اللي إحنا مش عايزينه يحصل أبداً.

جهزناه نفسياً و أصبح مستعد و متحمس… هنمشي معاه الخطوات كالتالي :-

١- هايتسحر معانا و نراعي إنه يشرب ماء و يبتعد عن المقليات و الملح اللي ممكن يسببوا العطش و ندعوه للذكر و قراءة القرٱن على قدر إستطاعته و نحاول إننا نبدأ ندعوه للصلاة في أوقاتها باللين و التحفيز و ما نستخدمش أبداً العنف و هنديله حرية التصرف حسب إستطاعته ..

٢- عند أذان الظهر ممكن نقدمله وجبه و ماء و يرجع يُمسك تاني لغاية المغرب علشان يفطر معانا و نحاول في الفترة دي نفهمه إنه يقلل حركته و يقعد في مكان بارد منعاً للإجهاد و العطش
و مفيش مانع لو عطش نقدمله ماء و لو جاع ممكن نلعب معاه لعبة الشيف اللي هايدوق لينا الأكل 😋😋 ..

٣- عند المغرب هايفطر معانا …

طبعاً النظام في البداية هايبقى يومين إلى ٣ في الاسبوع و نزود بالتدريج و لو الطفل تعب هنوقف … لإن لسه ماوصلناش لسن الإلزام إحنا بس رفعنا مستوى التدريب …

و كمان زي ما بنخلليه يصوم لازم نخلليه يشارك معانا في الصدقات و الذكر و إفطار الصائمين و قراءة القرٱن و الصلاة و ننبهه يصون لسانه و ما يتلفظش بأي لفظ سيئ … علشان يعرف إن رمضان مش جوع و عطش بس .

و ما ننساش مكافأة الصيام على كل إفطار بالبطل الصغير الصائم بسقفة كبيرة و مدح لإنجازه العظيم